Abbatia
Sancti Petri
de Curte

The Sayings of the Elders (Verba seniorum, Book VII)

How slander is to be avoided

Quomodo vitetur detractio.

This book is not translated in the edition used; the Latin is given alone.

1

Quidam frater requisivit abbatem Pimenium, dicens: Quomodo potest homo vitare, ne loquatur male proximo suo? Respondit senex: Ego et proximus meus duæ imagines sumus. Cum ergo meam imaginem reprehendero, invenitur imago fratris mei apud me venerabilis; quando autem meam laudavero, tunc fratris mei imaginem pravam respicio. Tunc ergo alii non detraho, si semper meipsum reprehendo: quia magnum virum despicit, qui seipsum non considerat.

2

Dicebat quidam Patrum: Quidquid habes odio, alii ne facias. Si odis qui tibi male loquitur, neque tu male loquaris de alio. Si odio habes qui tibi facit calumniam, neque calumniam tu alicui facias. Si odio habes qui te in contemptu ducit, aut injuriis appetit, aut aufert quod tuum est, aut aliquid tale facit, nihil horum facias alicui. Qui autem hoc verbum custodire potest, sufficit ei ad salutem.

3

Unus ex sanctis Patribus videns alium negligentem, flevit amare, dicens: Væ mihi, quia quomodo hodie iste peccat, sic et ego crastino. Et monebat discipulum suum, dicens: Quamvis aliquis graviter præsente te peccaverit, ne condemnes eum; sed sic apud te sit, tanquam tu plus eo pecces, quamvis ille sæcularis sit, nisi forte Deum blasphemaverit, quod est hæreticorum.

4

Quidam nomine Timotheus anachoreta, negligentem quemdam fratrem audiens, interroganti abbati quid illi fratri faceret, dedit consilium ut eum expelleret. Cum ergo ille expulsus esset, tentatio venit super Timotheum. Et cum imploraret in conspectu Dei, et diceret: Peccavi, miserere mei; venit ad eum vox, dicens: Timothee, ideo tibi hoc evenit, quia fratrem tuum in tempore tentationis suæ despexisti.

Latin text: Verba seniorum, Book VII of the Vitae Patrum, translated from the Greek by Paschasius of Dumium for Abbot Martin (Martin of Braga), in H. Rosweyde’s edition as reprinted in Migne’s Patrologia Latina, vol. 73 (1879 reprint), cols. 1025–1062, checked against the scans; without the editor’s notes and cross-references, and without the Greek text of chapter XLIV printed in the notes. Public-domain text in France (art. L123-1 of the French Intellectual Property Code). Transcription and revision: Abbatia Sancti Petri de Curte. Report an error